汪汪汪過新年

晴天PigPig @ 12個月大

新年啦!恭喜發財! 我晴天PigPig恭祝大家萬事如意，新年發大財！今年又唔係狗年，點解要用汪汪汪過新年做題目呢？皆因我家多咗隻汪汪！

其實係年三十晚係年宵市場買番來的氣球玩具。我哋一家食完飯同蛋糕之後，見適逢期會，就去年宵花市逛一逛。花就冇乜心機買，就去乾貨攤檔湊湊熱鬧！天氣真係凍，但勝在人夠多，可以互相取暖。咁啱媽咪的同事係嗰度擺檔，更加要去睇睇。姨姨話見我生日，要送一個俾我喎！咁我哋就揀咗呢隻四腳爬爬熊貓仔。

多謝姨姨送俾我o既生日禮物，而媽咪就另外俾錢買咗個米妮老鼠氣球俾我，都係幫襯姨姨o架！

但呢期我一逢見到四腳爬爬的嘢都叫汪汪，所以佢都不能幸免，終日汪汪，汪汪咁叫，直到年初一 ... ... 

要提早練習一下住洋樓，養番狗的生活囉！

唔好講笑，今年係我第一年出去拜年，一定要裝備充足 - 新衫新褲唔少得，最重要仲係要有個利是袋！

汪汪你就留係屋企看門口，我哋要出發去拜年啦！

利是袋係Elmo背囊，我成日揹住，擒高擒低都唔會阻到我，真係好方便啊！

就連佢哋都話個Elmo袋袋好使好用！